Linibo nga mga voter registrants ang wala na nahatagan sang queuing number sa satellite registration sang Commission on Elections sa Robinsons’ Place Bacolod.
Sa interview sang Bombo Radyo Bacolod kay Police Captain Ramie Sayson, deputy station commander sang Bacolod Police Station 3, sa pag-abot nila sa mall madamo na ang nagapila.
Gani gilayon sini ginkadtuan si Bacolod City Election Officer Atty Katrina Trinio Caña, kag ginsuhestyon nga magpanghatag na lamang sang queuing number.
Ini agud mapasulod na ang macater samtang mapanugyanan naman nga makapauli ang indi malab-utan.
Sa estimate, ginabanta nga nagadangat sa walo ka libo ang mga nagdugok nga voter registrants, kag ginatos sa mga ini ang gab-i pa lamang nagpila na sa gwa sang mall.
Ang pagginutok sang mga magaparehistro, nga dugangan pa sang madamo nga wala nakapamahaw ang nagresulta kun sa diin masobra 10 ang nalipungan.
Suno kay Sayson, yara sa 700 tubtob 800 ang nahatag nga numero, nga ila gilayon ginpasulod, nga 95 porsyento mga estudyante.
Ini kuntani ang nakita niya nga pamaagi agud indi na madugangan ang respondihan nga maglain ang pamatyag, apang aminado ang pulis nga matig-a pahangpon ang madamo sa mga voter registrants.
Suno diri, makapila na niya gin-eksplikar sa mga wala nahatagan sang numero nga sila ang indi na macater apang ang mga ini ang nagapakatig-a.
Ginhingyo man sini sa Atty Caña kun mahimo nga mahatagan na sang queuing number ang mga wala nalab-utan para bwas, apang ini ang wala ginpahanugutan sa kahangawa nga adlaw na maga-abot ang iban nga mahatagan sang numero.
Panugyan sini sa mga magaparehistro bwas, Agosto 10, last day sang voters’ registration period, nga magpadulong sa area sang temprano agud makabaton sang queuing number.
