Para sa mga luyag magpatattoo apang nahadlok sa dagom ukon sa tuslok, mahimo ini na ang sabat.
Isa ka startup sa isa ka pungsod ang nagpakilala sang bag-o nga teknolohiya nga nagahatag sang permanente nga tattoo apang halos wala sang mabatyagan nga sakit ang kliyente.
Ang Cipher X sa United Kingdom ang nagagamit sang special patch nga may microscopic needles nga nagabalhin sang ink sa ibabaw sang panit sa baylo sang regular nga tattoo machine nga liwat-liwat ang pagtuslok sa panit.
Santo sa kompaniya, ginabilin ang patch sa panit sang masobra 15 ka minutos agud ma-transfer ang ink.
Sa una nga mga inoras matapos ang proseso, indi pa klaro ang tattoo apang mangin maathag ini sa sulod sa 24 tubtob 48 ka oras ukon duha ka adlaw.
Madamo na sang naganyat sa nasambit nga teknolohiya apang limitado pa lamang ang disenyo nga pwede ipa-tattoo.
Ginpahayag sang Cipher X nga ginhimo nila ang ini nga teknolohiya agud mahatagan sang mas kumportable nga option ang mga luyag magpatattoo ilabi na ang mga may phobia sa dagom.
Sa karon, ang serbisyo ang limitado pa lamang sa London, apang plano sang kompaniya nga magpakig-angot sa mga tattoo artist agud makapresenta pa sang mas madamo nga disenyo sa palaabuton.
