Gin-athag sang tagpamaba sang 3rd Infantry Division sang Philippine Army nga wala pa matul-id kun miyembro sang New People’s Army ang nakaengkwentro sang 94th Infantry Batallion sa Sitio Binadlan, Brgy. Bi-ao, Binalbagan, Negros Occidental kahapon sang kaagahon kun sa diin may isa ka bangkay nga nasapwan kasunod sang engkwentro.
Sa interview sang Bombo Radyo kay Army Major Cenon Pancito III, nagapatigayon sang combat operations ang katapo sang Scout Platoon sang 94th Infantry Batallion (IB) alas-12:50 sang kaagahon kag sang nakaabot sila sa eskwelahan sang Binadlan, ginpalukpan ang tropa gani nagluntad ang pagbayluhanay sang lupok.
Kapin 20 ka mga armado nga persona ang nakaengkwentro sang tropa sang gobyerno kag sang alas 04:30 ang takna sang kaagahon, nagpatigayon ang tropa sang clearing operations kag nasapwan ang isa ka bangkay nga ginhingadlan kay Rico Paborale kag residente sang Sitio Cambungol, Brgy. Central Binalbagan, Negros Occidental.
Gin-athag man ni Cenon nga ginbuy-an na ang duha ka mga persona nga gindakop matapos nga mapamatud-an nga wala sila sang kahilabtanan sa nakaengkwentro sang 94th IB sa nasambit nga lugar.
Wala pa sang identity ang Army sa mga persona nga nakaengkwentro kag indi pa nila matumod kun katapo sang NPA bangud may yara sang nagapahayag nga may iban nga grupo nga naga-operate sa lugar.
Narecover man sa lugar ang caliber 45, 38 pistol, home made shotgun kag duha ka gatanas.
Nagapadayon pa ang imbestigasyon sang mga otoridad agud matumod ang identity sang armado nga mga persona.
