Ginhatagan pagtamod sang Philippine Army nga wala dapat sang iselebrar ika-51 nga anibersaryo sang Communist Party of the Philippines (CPP).
Ini ang ginpahayag ni Captain Cenon Pancito III, spokesperson sang 3rd Infantry Division (ID) sang Philippine Army may angut sa anibersaryo sang CPP sang Disyembre 26.
Suno kay Pancito, indi mahambal nga selebrasyon ang ikalima nga dekada sang pag-eksister sang komunista nga grupo bangud, lima naman ka dekada nga wala sila nagdaog sa gyera kontra sa gobyerno.
Nagakanugon lamang si Pancito nga lima naman ka dekada ang nausik nga kuntani gingamit nga tyempo sa pagpasanyog sang pungsod.
Samtang ginpahayag man sang army captain nga ini na ang tion nga dapat magpanindugan ang pumuluyo batok sa komunista nga grupo agud matapna na ang insurhensiya.
Ini ang sabat ni Pancito sa pahayag nga madamo sa gihapon nga pumuluyo ang nagasuporta sa New People’s Army (NPA) ilabi na sa mga nabukid nga lugar bangud nga wala man sila sang mahimo kun sila ang ginakadtuan.
Suno diri, dapat nga mag-report gid sa ila ang mga pumuluyo nga ginapalapitan sang NPA bangud nga naga-responder man sila gilayon.
Dugang pa ni Pancito, nga nagakadala man ang NPA kag wala na nagabalik sa isa ka lugar kun ila mareyalisar nga nagareport ang pumuluyo sa mga otoridad.
