Ginpasiguro sang tagpamaba sang 3rd Infantry Division sang Philippine Army nga nakahanda ang tropa sang militar nga sakop sang Region 6 kag Region 7 sa ano man nga terroristic attacks kasunod sa nagluntad nga twin bombing sa Jolo, Sulu kahapon nga ginkamatay sang 15 ka mga persona lakip na ang suicide bomber.
Sa interview sang Bombo Radyo Bacolod kay Army Major Cenon Pancito III, ginpahayag sini nga nakahanda ang hanay sang gobyerno sa ano man nga possible himuon sang mga terorista.
Suno kay Pancito, indi impossible nga matabo man diri ang natabo nga pagsigabong sa Jolo gani indi dapat magpakampante.
Nagapangabay man ini sa mga pumuluyo nga magkooperar kag magbulig sa gobyerno agud mapunggan ang pagpang-atake sang mga rebelde nga grupo.
Suno diri, kun may yara sang nahibaluan nga impormasyon, gilayon nga ipahibalo sa otoridad kaangay na lamang sa mga pulis ukon sa militar.
Ginhatagan-pagtamod man sini kun ano ka importante ang kada impormasyon nga nahibaluan sang kada isa agud nga matapna na ang mga terroristic activities nga ginahimo sang mga terorista.
