BACOLOD CITY — Wala nagakabalaka ang mga Pinoy kag mga residente sang South Korea sa ginpatigayon nga hydrogen bomb test sang North Korea.
Sa exclusive interview sang Bombo Radyo Bacolod kay Elmer Lahara sang Lipa City, Batangas apang 12 na ka tuig nga nagatrabaho sa Jecheon City, Chungbuk Province, South Korea, ginpahayag sini nga balewala sa amo nga pungsod ang nuclear test sang Pyongyang gani wala nila ginasapak ang balita tuhoy diri.
Wala sang news blackout sa Seoul apang wala nagagwa sa national television ang ginahimo sang North kundi sa social media lang nila nagakabasahan ukon nagakabatian.
Mismo ang mga taga-South Korea suno sa OFW ang naga-abiso sa ila nga indi magkabalaka bangud kumpyansa man ang mga ini nga himuon sang ila pungsod ang tanan agud nga sila ang maamligan kag indi man masarangan sang Pyongyang nga giyerahon ang kaingod nila nga pungsod.
Suno diri, wala man sang abiso ang South Korean government kag ang Philippine Embassy kun ano ang ila himuon sa tion sang missile test sang Seoul.
Gin-athag man sang OFW nga ordinaryo lamang ang military exercises sa South Korea, may missile test man ang Pyongyang ukon wala.
Suno kay Lahara, naanad na sila nga may nagalinupad nga fighter jets sa tion sang gab-i kag nagakadula man kun adlaw.
