Dako ang kahangawa ni Negros Occidental 5th District Representative Dino Yulo sa Sugar Order No. 7 nga nagamandu sang pag-import sang dugang nga 150,000 metric tons sang refined sugar.
Bilang anay board member sang SRA, nakita sang kongresista nga dako na katama ang supply sang refined sugar para sa subong nga crop year, gani ginakahangawa sini nga maapektuhan ang mill gate prices sa pag-umpisa sang milling season sa Setyembre.
Subong pa lamang nga Crop Year 2022-2023, nagdangat na sa 800,000 metric tons ang gin-import nga refined sugar sang Pilipinas.
Gindumdom man sini nga ginrason sa Sugar Order No. 6 ukon ang pag-import sang 440,000 metric tons sang refined sugar ang agud madugang sa buffer stock sang gobyerno, apang ginakatingala sini kun ngaa ang Sugar Order No. 7 ang para man sa buffer stocks.
Ginpaathag sang kongresista nga sa masami pierde ang mga small planters kun naga-import ang gobyerno bangod mas barato ang imported nga kalamay kag ini ang mas pilion sang bumalakal.
Bangod indi makacompete, naganubo ang mill gate prices sang kalamay.
Suno diri, antes ginpatuman ang Sugar Order No. 6, ang mill gate prices ang nagapatak sa P3,200 tubtob P3,400 apang pagsulod sang 440,000 metric tons nga imported nga kalamay, nagsarurot ang presyo sa P2,800.
Bangod madamo ang nagreklamo, makaligad sang isa ka semana, ginpasakaan ang mill gate prices sa P3,000, nga nagakahulugan nga halos wala na sang benta.
Agud makabawi sa kapierdihan suno sa iya, ang imported nga kalamay ang ginapasakaan ang presyo agud mapatasan ang presyo sang lokal nga produkto.
