Nasapwan nga wala na sang kabuhi ang isa ka minero matapos nga masuffocate sa sulod sang tunnel sa Sitio Arum, Barangay Talcagay, banwa sang Hinobaan sang Martes sang hapon.
Ang biktima ang ginkilala nga si Ignacio Ortega, 42 anyos, residente sang banwa sang Toboso.
Sa interview sang Bombo Radyo kay Police Major Jaynick Bermudez, hepe sang Hinobaan Municipal Police Station, sang Lunes, nanaog sa tunnel si Ortega kaupod ang pakaisa sini kag alas 4:00 sang hapon nagsunog sang bato ang duha gamit ang uling kag bangod sa aso naggwa ang mga ini ka nagdesisyon nga magpauli.
Sa masunod nga adlaw, alas 4:00 sang kaagahon isahanon nga nagbalik si Ortega sa tunnel kag alas 7:00 sang aga nasapwan na lamang sang pakaisa sini nga wala na ini sang kabuhi.
Nagahamyangon sa sulod sang tunnel si Ortega nga may ginauyatan pa nga flashlight.
Suno kay Bermudez, napatay ang biktima bangod sa suffocation samtang wala man sang may nakita nga foul play sa pagkapatay sini.
