Magapatigayon sang inspection subong nga adlaw ang Mines and Geosciences Bureau (MGB) kaupod ang Negros Occidental Provincial Disaster Risk Reduction and Management Office (PDDRMO) sa padayon nga pag-usmod sang duta sa bahin sang Sitio Bairan, Brgy General Luna, sa banwa sang Toboso.
Madumduman nga ginapanawagan ni Toboso Mayor Richard Jaojoco sa Mines and Geosciences Bureau nga usisaon ang lugar, bangud tubtob sa karon wala pa matumod kun may ara sang sinkhole sa idalom, ukon ini ang isa ka landslip.
Ginakahangaw-an sang alkalde kag sang mga pumuluyo ang pagdako sang mga litik kag padayon nga pag-usmod sang duta nga nagahatag sang risgo ilabi na sa mga estudyante nga nagalabay sa area.
Bangud sini, gina-abisuhan ang mga estudyante nga maglibot nalang sa pihak nga dalan kag ini ang ila naman nga ginkordon.
Ginalantaw nga ang nagapadayon nga pag-usmod sang duta ang mahimo bangud sa malapit nga faultline nga 500 metros lamang ang kalayuon sa aktibo nga East Negros Fault System sa tunga sang banwa sang Toboso kag Calatrava.
