Nagapati ang driver sang isa sa mga rescue vehicle nga nagresponder, nga wala na loose break ang mini dump truck nga nahulog sa pil-as sa Sitio Urong, Brgy. Kalamtukan, Bayawan City sa baylo ang aksidente ang tuga sang overspeeding.
Sa interview sang Bombo Radyo Bacolod kay James Babor, driver sang rescue vehicle sang Brgy Villasol, Bayawan City, may nadawat ini nga impormasyon nga antes paman maghalin ang salakyan naga-init na ang ulo sang driver.
Madumduman nga patay ang tanan nga sakay sang mini dump truck nga ginamaneho ni Egmedio Arnaiz samtang ang mga sakay naman amo sanday Diomedes Canoy, Kervin Andog, Larry Llamos, Ronel Cabasag, Jonathan Hamor, Jovanie Babor, Jonaryl Caguisa, lunsay mga empleyado sang City Agriculture Office – Engineering Division kag ang isa ka On the Job Training (OJT) engineering student nga si Warren Arceñas.
Pahayag sini nga naakig ang driver bangod may-ara sang nalate gani nadugayan ang ila nga paglarga, samtang apisar sa kainit sini ang mga sakay sa likod ang nagasinadya lamang kag nagapicture-picture.
Gani mataas ang posibilidad suno sa iya nga ginpadasigan sang driver ang dalagan sang mini dump truck.
Isa sa basihan sini nga wala naloose break ang truck ang bangod sa nakita nila nga skid mark.
Bilang driver, panindugan sini nga kun wala sang prino ang truck ini ang dapat nga nagderetso sa kalog.
Gani nagapati si Babor nga madasig ang dalagan sini rasun nga naglapaw sa dalan kag naglumpat sa pil-as nga nagadangat sa 50 metros ang kadalumon.
Sa pag-abot nila sa area, dugmok gid ang mini dump truck kag madamo sa mga pasahero ang nagkalapilpilan.
May-ara pa sang nagapangayo sang tabang, apang wala na makasalbar bangod nadugmok naman ang mga batiis kag butkon.// Naluoy man ini sa nagapangayo sang tabang, bangod ginapinsar sini ang iya mabilin nga kabataan.
