Nagdangat na sa P15.4 million ang balor sang poultry kag pork products nga nabalabagan kag wala napasulod sa probinsya sang Negros Occidental humalin sang gin-implementar ang pagbantay sa mga port of entry kaangay sa sea port kag airport agud nga indi makasulod ang African Swine Fever (ASF) kag Avian Infulenza ukon Birds Flu.
Nahibaluan nga padayun gihapon ang pagbantay sang probinsya batok sa ASF samtang ang banning sa poultry products bangod sa pagpamahog sang birds flu ang gin-extend naman sa Abril 16.
Suno kay Negros Occidental Provincial Veterinarian Dr Renante Decena, sang ginpatuman banning sa mga pork products batok sa ASF sang 2020, ang probinsya ang naka-intercept sang balor P5 million nga pork kag pork products.
Iban sa mga ini ang ginpabalik sa point of origin, ginkumpiskar, ginsunog ukon ginlubong.
Ini ang nadugangan pa sa 1st quarter sang 2021 sang balor P2.5 million.
AGani nagdangat sa kabug-usan nga P7.5 million nga balor sang pork products ang napunggan sang mga ini sa pagsulod sa probinsya sa 2020 kag 1st quarter sang 2021.
ASamtang madumduman nga ang banning sa poultry products ang nag-umpAsa naman sang Marso 1 tubtob 15 subong nga tuig.
Apang bangod sa paglapta sang birds flu sa mas madamo pa nga mga lugar, gin-extend ang banning sa Marso 16 tubtob Abril 16.
Nahibaluan nga ang una nga nakareport sang kaso sang Birds Flu ang ginalakipan sang Bulacan, Pampangga, Laguna, Camarines Sur kag Sultan Kudarat.
Apang sang Lunes, ini ang nadugangan pa sang Tarlac, Nueva Ecija, Bataan kag Benguet.
Suno kay Decena, nagdangat sa P7.9 million ang balor sang na-intercept nga poultry products.
Sa kabug-usan, balor P15.4 million na ang na-intercept sa pagbantay sang probinsya batok sa ASF kag Bird Flu.
