Malauman na sang mga empleyado sa private sector sa National Capital Region (NCR) ang pagsaka sa sweldo sa masunod nga mga binulan kasunod sang pagpagwa sang order sang Regional Tripartite Wages and Productivity Board sa Metro Manila sa pagpasaka sang daily minimum wage sa rehiyon.
Sa statement sang Department of Labor of Employment (DOLE), santo sa wage order, pasakaan ang daily minimum wage sang non-agriculture kag agriculture sector workers sang P40.
Sa adjustment, ang daily minimum wage sa NCR ang magasaka na sa P610 gikan sa karun nga P570 para sa non-agriculture sector workers.
Samtang, sa mga nagatrabaho naman sa sektor sang agrikutura, services, mga retail establishments nga may 15 ka empleyado ukon mas manubo kasubong man ang mga manufacturers nga naga-employ sang 10 ukon mas manubo nga empleyado, magasaka ang daily minimum wage sa P573 gikan sa anay P533.
Ang development ang naggwa, kasunod lamang sang pagpahayag ni President Ferdinand “Bongbong” Marcos Jr. nga malapit nalang kag ma implementar na ang pagsaka sang minimum wage sa pungsod sa tinutuyo nga maseguro nga protektado ang mga empleyado gikan sa “rapid expansion” sang Philippine economy.
Ini ang ginpahayag sang Presidential Communications Office sang nagpatigayon sang courtesy call sa Malacañang si International Labor Organization director general Gilbert Houngbo.
