Nagapabilin sagihapon sa Alert Level 3 ang Bulkan Kanlaon apisar sang minor volcanic eruptions sini sang Huwebes, Enero 6.
Sa interview sang Bombo Radyo Bacolod kay Mari Andylene Quintia, resident volcanologist sang Kanlaon Volcano Observatory, naestablisyar sa ila monitoring nga antes ang minor erruption sang bulkan may yara sang narekord nga pagnubo sang sulfur dioxide emission kun sa diin 1000 tubtob 2000 tonnes per day lang ang narecord.
Suno kay Quintia antes man ang minor erruption, narecord man ang volcanic earthquakes kag wala man sang ash emission.
Ang nasambit nga erruption ang nagatuga man sang pagbara sa baba sang bulkan.
Suno kay Quintia, ang clog sa systema sang bulkan ang nagtuga sang pressure sang gas nga indi makagwa gani nagluntad ang minor erruption.
Ginpahayag sini nga kun may yara sang gulpyada nga pagbag-o sa data mahimo nga ipasaka sa alert level kag lauman ang isa ka major eruption sang Bulkan Kanlaon.
Ginpahayag sang gobernador sa probinsya sang Negros Occidental nga wala man sang pagbag-o sa mga evacuation sa probinsya sang Negros Occidental bangud naevacuate naman ang yara sa 6 kilometers dangers zone apisar sang minor erruption.
Suno kay Negros Occidental Governor Eugenio Jose “Bong” Lacson, status quo ang mga evacuees kag aminado ini nga dako nga pagpanghangkat bangud wala sang tion nga mangin handa ang mga pumuluyo sa pagluntad sang minor nga mahimo magtuga sang major erruptions.
Nagapadayon man ang probinsya sa pagbulig sa mga evacuees kag mga apektado sa aktibidad sang Bulkan Kanlaon kag nakahibalo ang mga ini nga yara ang national government nga nakahanda nga magbulig sa ila.
