Nabatian sa banwa sang La Castellana kag ciudad sang La Carlota ang paglupok sang Bulkan Kanlaon kasunod sa minor explosive eruption nga nagluntad, kahapon alas- 3:11 sang hapon.
Suno sa Philippine Institute of Volcanology and Seismology (PHIVOLCS) ang ereuption ang nagdugay tubtob sa duha ka minutos santo sa seismic kag infrasound records sang Kanlaon Volcano Network.
Nagdangat sa 600 meters ang kataason sang plume nga nagpadulong sa nabagatnan-nakatungdan nga dereksyon kun sa diin naglapta sa Sto. Mercedes kag San Luis, Brgy. Sag-ang, La Castellana, Negros Occidental ang abo.
Nabatian ang paglupok sang bulkan sa Brgy. Yubo, La Carlota City kag Brgy. Sag-ang, La Castellana.
Napanimahoan man ang baho sang asupre sa pila ka barangay sang La Castellana.
Bangod sa pag-ulan, may lahar flow nga naeksperyensyahan sa bahin sang La Castellana kag Moises Padilla.
Yara sa gihapon sa Alert Level 3 ang status sang bulkan bangod sa magmatic unrest.
Ginarekomenda sang PHIVOLCS sa mga nagapuyo sa sulod ukon malapit sa 6-km radius permanent danger zone nga mag-evacuate kun kinahanglan agud malikawan ang risgo sa lava flow, rockfalls, pyroclastic density currents ukon PDCs kag iban pa nga related hazards.
Mas ginapahalong pa gid ang tanan sa ginalauman nga syn-eruption lahars kag sediment-laden streamflows sa tion nga may mabaskog nga pag-ulan.
