Kasunod sang hayag nga pag-endorso ni former Negros Occidental 3rd District Rep. Albee Benitez kay anay senador Bongbong Marcos bilang presidential candidate, nangin hayag naman ang pagsuporta sang iya misis kay Vice President Leni Robredo.
Kahapon sang aga, linibo ka mga supporters ang nagpadulong sa Kabankalan Catholic College kun sa diin tuman kagutok ang mga tumalambong St. Columban Sports Center.
May pila naman ka mga supporters nga naghatag sang artworks sa bise presidente.
Isa sa mga nagpadulong sa Kabankalan Catholic College amo ang misis sang anay kongresista nga nagsuksok pa sang all-pink outfit lakip ang iya bag.
Nagpakuha pa ini sang litrato agud ipakita ang iya suporta sa bise presidente.
Sa interview sang Bombo Radyo kay Mrs. Dominique Benitez, gin-athag sini nga personal choice niya ang pagsuporta kay Robredo kag wala man ini gindumilian sang iya bana.
Suno kay Mrs. Benitez, suportado niya ang bise presidente bangud nagahatag ini sang inspirasyon sa mga babayi, maisog, mabakod kag hardworking.
Halin sa ciudad sang Kabankalan, nag-upod man si Mrs. Benitez sa grand rally sang Leni-Kiko team sa Paglaum Sports Complex sa ciudad sang Bacolod.
