BACOLOD CITY — Bangud lamang sa pispis, pilason ang isa ka asawa matapos nga nalukpan sang armas-luthang sang kaugalingon nga bana sa ciudad sang Kabankalan.
Ang pilason ginkilala kay Gema Espirela, 32-anyos kag residente sang Sitio Badiangay, Barangay Oringao, Kabankalan City samtang ang suspetsado amo si Rodulfo Espirela Jr. nga bana sang biktima.
Sa impormasyon nga nakuha sang Bombo Radyo, gintuyo ni Rodulfo, Domingo sang aga, nga tiruhon ang isa ka pispis gamit ang iya armas-luthang.
Ginsaway ini sang iya misis kag ginhana nga kuhaon ang iya armas tubtub nga sila ang nag-agaway.
Nahulog ang pusil sa salog kag aksidente nga naglupok nga nag-igo sa tiyan sang misis.
Sa pagsikyar sang mga pulis, narekober ang .38 caliber revolver nga may apat ka mga bala.
Wala sa ila balay ang bana apang ginahanda na sang mga pulis ang kaso nga ipasaka batok diri.
