Gilayon nga nagsungka sa mga otoridad ang security guard nga nagluthang-patay sa iya live-in partner sa ciudad sang Dumaguete, Negros Oriental bangud sang gina-alegar pagpangimon.
Sa impormasyon nga nakuha sang Bombo Radyo Bacolod, igo sa liog, dughan kag hawak ang naangkun sang biktima nga si Ma. Teresa Arieta, 39-anyos sang Mango Avenue, Brgy. Piapi, Dumaguete City sang ini ang ginluthang sang iya partner nga si Rey Martin Noble, 49-anyos.
Nagluntad ang insidente alas-9:00 sang gab-i, nagligad nga Noviembre 7 sa compound nga ginabantayan mismo sang suspek sa Purok Manga, Brgy. Balugo, Dumaguete.
Santo sa imbestigasyon, alas-4:00 sang hapon sang Noviembre 7 sang nag-inom ang duha sa Siliman Beach, Bantayan, sa nasambit nga ciudad kag pagka-alas-6:00 sang gab-i, nagkadto ang mga ini sa Brgy. Balugo agud balikan ang ila 7 katuig nga bata nga ginbilin sa caretaker.
Apang pagka-alas-9:00 sang gab-i naglalisay ang duha kun sa diin ginpahayag nga nagpangimon si Noble sa gina-alegar relasyon ni Arieta sa ginkilala kay Lloyd Abasa sang Campaclan, Sibulan, Negros Oriental.
Gamit ang iya nga service firearm, ginluthang sang suspetsado ang biktima nga nagresulta sa iya gilayon nga kamatayon.
Gilayon naman nga nagsungka sa mga otoridad si Noble.
