Gilayon nga naghikog ang isa ka lalaki matapos sini nga ginbuno ang iya nga asawa sa banwa sang Isabela, Negros Occidental.
Suno kay P/Capt Joseph Partidas, hepe sang Isabela Municipal Police Station, santo sa ila nga imbestigasyon magkatupad nga nagatulog ang mag-asawa sa ila balay sa Barangay Banogbanog, Isabela sang hinali nalang nga nagbangon ang bana, 32 anyos nga wala na ginhingadlan, kag naggwa bangod gina-alegar nga may nagakabatian ini nga tingog sa gwa sang balay.
Bangod sini, nagbangon man ang asawa sini nga ginkilala kay Lenlen Heniega, 28 anyos kag nagsunod sa iya nga bana.Apang sa paggwa sini, hinali nalang siya nga ginbuno-buno sang iya nga bana.
Nahimo naman nga makapalagyo sang biktima kag nagpangayo sang bulig sa kaingod balay gani siya ang gilayon man nga gindala sa Luz-Sikatuna Primary Hospital sa Guihulngan City, Negros Oriental agud madapatan sang atensyon medikal.
Kasunod sang krimen, gilayon man nga nagpalagyo ang bana, apang nasapwan nalang ini kapin 1.5 kilometers gikan sa ila balay nga nagabitay na sa puno sang kahoy kag wala na sang kabuhi.
Suno kay Partidas, ginpahayag man sang asawa nga may history na sang mental disorder ang iya nga bana.
Ginlantaw man sa karun nga nagtukar ang balatian sang bana gani nahimo sini nga bun-on sang kitchen knife ang iya nga asawa.
Dugang pa sini nga wala man sang gin-awayan ang mag-asawa antes natabo ang insidente.
Sa karun padayun pa nga ginabulong si Lynlyn sa ospital.
