Misis sa Manjuyod, Negros Oriental, patay matapos ginbuno sang iya kaugalingon nga bana; suspetsado nagtuyo man nga magpanginmatay

Patay ang isa ka 36-anyos nga misis matapos ginbuno sang iya kaugalingon nga bana sa Sitio Dobdob, Barangay Sacsac, Manjuyod, Negros Oriental.

Sa impormasyon nga nakuha sang Bombo Radyo, nag-away sa ila puluy-an ang mag-asawa nga ginhingadlan lamang sang mga kapulisan kay certain Analita kag certain Lindo.

Bangud diri, nanghimos sang gamit si Analita kag magapadulong kuntani sa ciudad sang Kabankalan sa Negros Occidental kaupod ang iya menor-de-edad nga bata nga lalaki.

Nangakig naman si Lindo kag nagkuha sang hunting knife kag hinali na lamang nga ginbuno sang makapila ka beses si Analita nga gintunaan sang iya kamatayon.

Ginbuno man sang bana ang iya kaugalingon apang ini ang nakasalbar kag natabangan sa ospital.