Nagpositibo man sa coronavirus ang misis sang executive assistant sang alkalde sang La Carlota, Negros Occidental nga una nga nagpositibo sa COVID.
Nahibaluan nga ginpaidalum sa lockdown ang city hall sang ciudad sang La Carlota kahapon tubtob sa Biyernes bangud nagpositibo sa coronavirus disease 2019 ang executive assistant ni Mayor Rex Jalando-on.
Sa interview sang Bombo Radyo kay Jalando-on, ginkumpirmar sini nga nagpositibo ang isa sa mga empleyado sa city hall kag madamo ini sang ginkadtuan nga mga opisina gani agud mangin safe sa tanan, iya gindesisyunan nga ipaidalum na lang sa lockdown ang bilog nga city hall agud makapatigayon sang disinfection.
Suno diri, 15 ka mga persona na ang nacontact trace sa iya opisina kalakip na siya kag ginkuhaan ang mga ini sang swab sample sang Dominggo.
Suno diri, wala man sang may nagapakita sang sintomas sa mga ini.
Suno sa alkalde, nagpositibo man sa virus ang asawa sang iya executive assistant samtang nagnegatibo naman ang bata sini.
Sa karun, yara sila sa quarantine facility samtang ang mga nakadirect contact sang nasambit nga empleyado ang nagapaidalum sa home quarantine.
Suno sa iya, apisar nga magnegatibo ang mga nakadirect contact sang empleyado, kinahanglan gihapon tapuson ang pulo ka adlaw nga quarantine sang mga ini.
Apisar sang lockdown, suno kay Jalando-on, nagapadayon sa pag-operar ang City Disaster Risk Reduction Management Office kag Fire bangud critical ang mga ini.
