Ginlaragway sang misis ni Arnold Rivera nga mataas kag itumon ang pamanit sang lalaki nga nagtiro sa biktima sa Hacienda Malinao, Barangay E. Lopez, ciudad sang Silay kagab-i.
Sa interview sang Bombo Radyo kay Marilyn Rivera, manubo kag itumon ang pamanit sang lalaki nga nagasakay sa isa sa duha ka motorsiklo nga nagbantay sa higad sang dalan sang sila ang naglabay apang ang trigger man ang taason kag itumon ang pamanit.
May yara man suno sa iya sang duha ka lalaki nga naggwa sa puti nga awto nga naglambat sa ila apang indi niya matumod kun pila gid ang nagasakay sa kotse.
Suno kay Mrs. Rivera, nagasuksok sang itom nga bonnet ang mga suspetsado kag lunsay wala sang plate number ang duha ka motorsiklo kag ang awto.
Suno sa misis, kuntani konsensyahon ang mga suspetsado nga nagpatay sa iya bana sa atubang mismo sang ila 11-anyos nga anak.
Suno kay Marilyn, nagsinggit pa ang iya bana nga madalagan sila sang ila anak apang nagtiyabaw lang ang misis kag naglantaw samtang ginatiro ang iya mister.
