Nagapati ang asawa ni Gaudioso Empase, manugpataya sang STL nga ginluthang sang ginaalegar riding-in-tandem suspects sang Huwebes sang gab-i sa Barangay Sum-ag, nga mistaken identity ukon nasal-an lang ang iya bana.
Madumduman nga manugremit kuntani sang taya sa STL ang 53-anyos nga amay nga nagapuyo sa SP Village, Brgy. Pahanocoy, Bacolod City sang ginluthang ini sang mga suspetsado samtang nagamaneho sang tricycle sa Bangga Tomaro, Brgy Sum-ag Bacolod City pasado alas 9:00 sang gab-i.
Bangud sa madamo nga igo sang bala sa lawas, gilayon ini nga ginbawian sang kabuhi.
Kaupod sini nga nagasakay sa tricycle ang iya pakaduha nga si Rolly Empase.
Sa interview sang Bombo Radyo kay Sarah Empase, asawa ni Gaudioso, nagapati ini nga mistaken identity ang rason kun ngaa ginluthang ang iya nga bana bangud wala ini sang kontra kag wala man nagapakigbahin sa illegal nga buluhaton.
Suno kay Sarah, ginpahayag sang iya bana nga indi gid ini magsulod sa illegal nga druga bangud sa anum ka mga kabataan sini, lima diri ang babaye.
Suno sa iya, mabuot, mapinalanggaon nga amay kag bana kag wala gid sa may isaway kay Gaudioso gani wala ini sang may makita nga rason kun ngaa patyon ini.
Gindugang man sini nga kun may luyag nga magpatay sa iya, duha ka tuig na ini nga nagapauli siya lang isa kun gab-i apang natabuan pa nga ginluthang ini sang siya ang may upod.
Antes pa man ang insidente, ginpaambit ni Sarah nga daw nagpamilin-bilin na ang iya asawa sa iya subang nga bata bangud nakaistoryahanay sila kag nakamuno ini nga ang bata niya na ang bahala sa pagasto sa ila pamilya bangud tigulang na ini.
Nagalaom man ang iloy nga mahatagan sang hustisyo ang natabo sa ila padre de pamilya.
