Ginkoronahan bilang Miss Universe Philippines 2022 kagab-i si Miss Pasay Celeste Cortesi.
Ang korona ang ginpasa sa iya ni Miss Universe Philippines 2021 Beatrice Luigi Gomez sa coronation night sa Mall of Asia Arena kagab-i.
Kasunod ni Celeste sanday Miss Makati Michelle Dee bilang Miss Universe Philippines Tourism kag Miss Bohol Pauline Amelinckx bilang Miss Universe Philippines Charity.
Si Miss Misamis Oriental Annabelle McDonnel ang nangin 1st runner-up samtang si Miss Taguig Katrina Llegado ang 2nd runner-up.
Sa Question and Answer portion, ginpamangkot kay Celeste kun paano sini gamitun kun sarang mapa-untat ang oras sa isa ka adlaw.
Sabat sini nga iya pagagamitun sa pamilya partikular na sa iya nga iloy kun sarang sini nga mapauntat ang oras.
Panaysayon sang beauty queen nga duha na ka tuig ang nakaligad sang ulihi sini nakita ang pamilya bangod nagapuyo ang mga ini sa Italy kag siya naman ang nagaisahanon sa Pilipinas.
Gani usaron sini ang kahigayunan agud mahambal sa iloy kun ano niya ini ka palangga.
Sa casual interview, ginpahayag sini nga halos magka-angay ang Italian heritage kag Filipino heritage sa bahin sang mga strong women kasubong man sa paghatag sang bili sa pamilya.
Dugang pa ni Celeste nga isa sa gintudlo sa iya sang iya nga iloy amo ang mangin mapasinalamatun sa pamilya, sa pinalangga sa kabuhi, kag sa mga tawo sa palibot, bangod kun mapasinalamatun kag mabuot ang tawo ang mangin mabuot man kag mapasinalamatun.
Si Celeste man ang nagdaog sang Best in Swimsuit kag Miss Photogenic awards.
