Ginpanugyanan sang pageant blogger nga si Norman Tinio si Taguig City Sandra Lemonon matapos mag-trending ini sa social media bangud sa iya mga cryptic posts sa Instagram stories.
Sa interview sang Bombo Radyo Bacolod kay Tinio, ginpahayag sini nga apisar indi pa siya familiar gid sa specific allegations ni Lemonon, dapat may yara ini sang pamatuod antes siya magpasibangod batok sa isa ka tawo ukon sa isa ka organisasyon.
Suno kay Tinio, dapat nga first-hand witness mismo si Miss Taguig City kag indi halin sa mga text ukon social media messages lang ang iya mga alegasyon.
Dugang pa sini nga kun wala sang pamatuod si Lemonon, magapabilin lamang ini nga espekulasyon.
Kun sensitive naman ini suno sa pageant blogger, dapat nagkuha sang legal counsel si Lemonon agud magiyahan ini sa kun ano ang dapat nga ihambal kag indi dapat.
Kahapon, ginkoronahan si Rabiya Mateo sang Iloilo City sa inaugural Miss Universe Philippines pageant nga ginhiwat sa Baguio Country Club.
Ginlutos sang 23-anyos nga Ilongga beauty queen ang 45 ka mga kandidata nagikan sa nagkalain-lain nga mga ciudad kag probinsya sa pungsod lakip na si Lemonon nga nagtapos lamang bilang kabahin sang top 16.
Nahibaluan nga indi ini first time ni Lemonon nga mag-intra sa mga national beauty pageant.
Nangin fourth runner-up ini sa Miss World Philippines 2016 kag finalist sa Bb. Pilipinas 2018.
