Nagpaabot sang ila simpatiya ang Miss Universe Organization (MUO) sa mga pumuluyo sang Pilipinas kag Vietnam matapos ang halit nga ginbilin sang Bagyo Tino.
Sa isa ka video nga gin-share sa Instagram ni Miss Universe Victoria Kjaer, ginpahayag sini ang iya simpatiya sa mga pamilya nga apektado sang Bagyo Tino ilabi na ang mga nadulaan sang mga pinalangga sa kabuhi.
Suno kay Kjaer, nagpasalamat man ini sa mga lokal nga otoridad, rescue teams kag mga organisasyon nga naghatag sang bulig kag relief assistance.
Gindugang pa sini nga sa tion sang kabudlayan, ginapakita sang katawhan ang ila kusog, kaisog kag pagbinuligay.
Suno diri, ang Miss Universe Organization ang nagatindog upod sa katawhan sang Pilipinas kag Vietnam kag nagapangamuyo para sa madasig nga pagbangon.
Madumduman nga nagdala sang mabaskog nga ulan kag hangin ang Bagyo Tino sa pila ka bahin sang Pilipinas kag vietnam nga nagtuga sang pagbaha, halit sa pila ka mga pamalay kag madamo sang nagkalamatay.
