ODESA, UKRAINE – Nag-igo ang missiles malapit sa southern port sang Odesa sa Ukraine kahapon kadungan sa pahayag sang Russia nga nawasak nila ang oil refinery nga ginagamit sang Ukrainian military.
Apisar sina ang plano nga pag-evacuate sa mga tawo gikan sa gina-atake nga syudad sang Mariupol, ang magapadayun.
May-ara naman sang gamay nga sinyales sang breakthrough sa efforts nga pagnegosyar sa pagtapos na sang lima ka semana nga gyera, samtang ginpahayag naman sang chief negotiator sang Russia nga magapadayun ang paghinun-anon subong nga Lunes.
Sa Odesa, ginpahayag sang city council nga “critical infrastructure facilities” ang gin-igo sang mga missiles.
Samtang wala naman sang casualties nga nareport.
Ginpahayag sang defense ministry sang Russia nga ang pag-atake sang Russian military ang nagguba sang isa ka oil refinery kag tatlo ka fuel storage facilities malapit sa Odesa.
Pahayag sini nga ang nasambit nga pasilidad ang ginagamit sa pagsupply sa Ukrainian troops nga malapit sa syudad sang Mykolaiv.
Nahibaluan nga ang Odesa nga yara sa Black Sea, amo ang mayor nga base para sa navy sang Ukraine.
Ini ang gintarget sang Russian forces nga nagatuyo nga makahuman sang alagyan padulong sa Transdniestria, isa ka Russian-speaking nga separado nga probinsya sang Moldova nga ginaplastaran sang mga Russian troops.
Suno kay Vladyslav Nazarov, officer sa South Operational Command sang Ukraine, makita ang pagtimbook sang aso sa pila ka mga lugar sa syudad.
Apang tanan naman nga importante nga sistema kag structures ang nagatrabaho kag wala sang nareport nga casualties.
Ginpahayag naman ni Dmytro Lunin, gobernador sa central Poltava region, nga nawasak ang Kremenchug oil refinery, 350 kilometros sa northeast sang Odesa, kag ini ang naguba sa separado nga rocket attack sang Sabado.
