Arestado ang miyembro sang CAUNDA Drug Group sa drug buybust operation nga ginpatigayon sa Purok Maghili-ugyon, Barangay 35, Bacolod City.
Ang operasyon ang ginpatigayon sang Special Drug Enforcement Team sang Bacolod Police Station 1 alas-11:24 sang gab-i sang Miyerkules.
Duha ang nadakpan nga ginalakipan nanday Rodnel Tiberio, 32 anyos, high value individual, yara sa listahan sang Barangay Anti-Drug Abuse Council (BADAC), residente sa lugar kag Jona Mae Cuambot, 29 anyos, residente sang Purok Maya, Barangay 16, Bacolod City.
Si Tiberio ang nadakpan na sang 2019 bangod man sa illegal nga droga kag nakagwa sang 2020.
Narecover sa mga ini ang siyam ka sachet sang suspected shabu nga ginabanta nagabug-at sang 12 gramos kag may standard drug price nga P81,600.
