Nagsungka sa kapulisan kag mga army personnel ang isa ka miyembro sang Communist Party of the Philippines-New People’s Army (CPP-NPA) sa Guihulngan City, Negros Oriental.
Sa interview sang Bombo Radyo kay Lt. Col. William Pesase, commander sang 62nd Infantry Battalion sang Philippine Army, ginkilala ang anay rebelde kay alyas “Ka Justine” ukon “Roden”, residente sang Sitio Natuling, Barangay Budlasan, Canlaon City, nga nagturn-over man sang isa ka .38 caliber revolver.
Suno kay Pesase, si Ka Justine ang isa sa mga local NPA sa area kag amu ang nagafacilitate kun nagasulod ang mga armado sa lugar.
Madugay naman ini nga miyembro sang hublag kag ginagamit agud mag-intimidate sa mga kabarangayan nga una na nila nga na-organisa.
Sang tinalikdan nga Miyerkules, siya ang nagsurrender pinaagi sa koordinasyon sa tunga sang Canlaon City Police Station kag 62nd IB sang Philippine Army.
Ang iya pagsungka ang resulta sang nagapadayon nga intensified campaign sang local Task Force to End Local Communist Armed Conflict (TF-ELCAC).
