Nagpanindugan ang miyembro sang House Committee on Energy nga tuman ka kulang ang P200 nga unconditional cash transfer sa 12 million poor households sa baylo nga suspendihon ang excise tax sang produktong petrolyo nga isa man sa ginatunaan sang pagmahal sini.
Sa interview sang Bombo Radyo kay Congressman Carlos Isagani Zarate, indi makabulig ang P200 sa kada pamilya kag kaangay nga gin-insultuhan pa ang mga ini.
Suno kay Zarate, may kamatuoran ang ginapahayag sang Department of Finance kag sang subong administrasyon nga dako ang mabuhin sa revenues sang pungsod kun isuspend ang excise tax apang makabulig ini sa mga pumuluyo.
Suno sa kongresista, indi lang ang transport sektor ang mabuligan sa tion nga masuspend ang nasambit nga buwis bangud mabuhinan sang halos P4 tubtub P6 ang kada litro sang produktong petrolyo nga ginabakal sang mga pumuluyo.
Suno kay Zarate, ang nabuhin sa presyo sang gatong nga ginbakal sang konsumidor ang mahimo ibakal sang pagkaon para sa pamilya bangud halos tanan nga mga nagapanguna nga balaklon sa karun ang nagmahal man.
Suno diri indi lang Committee on Energy nga ginapamunuan ni Representative Mikee Arroyo ang nagaduso nga magpatawag sang special session si Presidente Rodrigo Duterte angot sa pag-amend sang oil deregulation law kag ang suspendihon ang excise sa produktong petrolyo kundi ara man ang Committee on Economic Affairs nga ginapamunuan ni Representative Sharon Garin,Committee on Ways and Means nga ginapamanuan ni Representative Joey Salceda kag ang Transportation Committee nga ginapamunuan ni Edgar Mary Sarmiento bangud nakita na sang mga ini nga tuman na kamahal ang presyo sang gatong kasubong man ang asud-asod nga pagpasaka sang presyo sini.
Suno kay Zarate nakita na sini sadto pa nga ang DOF na mismo ang wala sang gana magsuspend sang excise tax bangud sang tinalikdan nga mga tinuig masobra 30 ka beses nagpasaka sang presyo sang gatong ang mga oil companies, wala gingamit sang nasambit nga ahensiya ang pribilehiyo sini nga ginhatag sang kongreso nga isuspend ang excise kun magsobra sa $65 per barrel ang productong petrolyo sa idalom sang train law sa sulod sang tuig 2018-2020.
