Nakilala na ang miyembro sang New People’s Army nga napatay kasunod sang engkwentro batok sa mga suldado sa Sitio Cansimba, Barangay Quintin Remo, Moises Padilla kahapon sang udto.
Suno kay Brigadier General Orlando Edralin, commander sang 303rd Infantry Brigade, mismo ang mga kaupod kag mga himata sang napatay ang naghatag sang identity ni Joel Blasco alyas Carpo, kag residente sang Sitio Tibobong, Barangay Quintin Remo.
Si Blasco ang miyembro sang Central Negros 1.
Naclaim naman sang iya nga pamilya ang bangkay sini.
Naghatag man sang bulig ang local government sang Moises Padilla sa pamilya ni Blasco agud nga ini ang mapalubong.
Nahibaluan nga nasugata sang 62nd Infantry Battalion ang kapin tatlo ka NPA members.
Sa tatlo ka minutos nga pagbayluhanay sang lupok, napatay ang isa ka lalaki nga NPA member.
Narecover man sa area ang isa ka cal. 38 revolver, isa ka hand grenade, kag personal nga pagkabutang sang rebelde nga grupo.
