Patay ang isa ka ginaalegar miyembro sang New People’s Army sa engkwentro batok sa 94th Infantry Battalion sang Philippine Army sa Sito Cabiti, Brgy Santol, Binalbagan, Negros Occidental pasado alas 4:00 kaina sang kaagahon.
Sa interview sang Bombo Radyo kay Col. Orlando Edralin, commander sang 303rd Infantry Brigade sang Philippine Army, tatlo ka asod-asod nga engkwentro ang nagluntad kaina sang kaagahon batok sa isa lamang ka grupo sang mga rebelde.
Suno kay Edralin, ang una nga engkwentro ang natabo alas 2:32 sang kaagahon sa tunga sang 62nd Infantry Battalion sa Barangay Camangcamang, banwa sang Isabela kag nagdugay sang lima tubtob pito ka minutos.
Pagka-alas 2:45 sang kaagahon, liwat nga nagbayluhanay sang atake ang militar kag mga rebelde sa kaangay lamang nga area.
Ginabanta 15 ka mga NPA ang naka-engkwentro sang mga militar.
Pasado alas 4:00 sang kaagahon, naglab-ot na sa boundary sang Isabela kag Binalbagan ang mga rebelde kag ila naka-engkwentro ang mga katapo sang 94th Infantry Battalion.
Suno kay Edralin, diri narecover ang isa ka bangkay sang isa ka lalaki nga NPA.
Sa karun ginahibalo pa sang identity sang napatay nga rebelde.
Wala naman sang may nasamaran sa bahin sang militar.
