Patay ang isa ka miyembro sang New People’s Army (NPA) sa engkwentro batok sa 62nd Infantry Battalion sang Philippine Army sa Sitio Malatanglad, Barangay Budlasan, Canlaon City, Negros Oriental, alas-4:40 kahapon sang hapon.
Sa interview sang Bombo Radyo kay Lt. Col. William Pesase, commander sang 62nd Infantry Battalion sang Philippine Army, nagdugay sang kapin 5 ka minutos ang engkwentro sa tunga sang 62nd Infantry Battalion kag Central Negros 1 sang NPA.
Suno diri, lima ka katapo sang NPA ang ila naengkwentro kun sa diin isa ang patay diri.
Wala naman sang may nasamaran sa bahin sang Philippine Army.
Wala naman ginpa-evacuate ang mga pumuluyo bangod nga nasecure na ang area.
Nakarecover man sang pila ka mga armas-luthang ang militar gikan sa encounter site.
Madumduman nga sang Abril 15, 2023, na-aresto ang isa ka most wanted nga miyembro sang New People’s Army matapos sa Joint Law Enforcement Operation sang 62nd Infantry Battalion kag Canlaon City Police Station sa Sitio Anatuling, Brgy Budlasan, Canlaon City, Negros Oriental kag ini ang ginkilala nga si Jerry Montefalcon alyas “BULHOT”, 49 anyos, kasado, kag miyembro sang Central Negros 1.
