Patay ang isa ka miyembro sang New People’s Army kag pilason ang duha ka suldado sa nagluntad ang engkwentro sa tunga sang militar kag communist terrorist group kahapon sang udto sa Guihulngan City, Negros Oriental.
Suno kay Maj. Cenon Pancito III, spokesperson sang 3rd Infantry Division sang Philippine Army, ginapatihan nga katapo sang Central Negros 2 front sang Kilusang Rehiyon Negros ang naengkwentro sang militar.
Duwa ka lokasyon ang kampo sang mga rebelde gani gin-organisar man ang mga suldado sang 62nd Infantry Batallion para mag-atubang sa mga grupo.
Ang una nga lokasyon amo ang Sitio Maluy-a, Barangay Sandayao, Guihulngan City, Negros Oriental kun sa diin na-engkwentro sang mga militar ang malapit 15 ka mga miyembro sang grupo.
Nakumpirmar naman nga may napatay sa bahin sang mga rebelde samtang may isa naman nga katapo sang NPA ang ginatinguhaan nga marevive sang militar.
Wala naman sang nasamaran sa bahin sang militar sa nasambit nga engkwentro.
Ang ikaduwa naman nga engkwentro ang nagluntad sa Sitio Tabago nga kahabin sang amo man nga barangay.
Duwa naman ka mga suldado ang nasamaran sa nagluntad nga engkwentro.
Ginapatihan nga kabahin lang sang isa ka grupo ang nakaengkwentro sa magkatuhay nga sitio.
Ginkumpirmar naman ni 62nd IB commander Lt. Col. Melvin Flores nga padayon pa nga ginakilala ang identity sang NPA nga napatay.
Narekober naman ang isa ka caliber .45 pistol, isa ka carbine kag isa ka homemade shotgun.
Ginpasalig naman ni Flores nga magapadayon ang ila nga pursuit operation batok sa mga rebelde.
Nagdeploy naman sang dugang nga pwersa sang militar agud nga magbantay sa lugar.
