Yara na sa maayo nga kondisyon ang katapo sang Philippine Army nga napilasan sa shooting incident kaagahon, January 4 sa Purok San Roque, Brgy. Handumanan, ciudad sang Bacolod.
Nahibaluan nga ang biktima nga si Jasper Romas Gancia, 34 anyos, residente sang Brgy. Bata, Bacolod City, nga assigned sa 8th Scout Ranger Camp Ranao, Marawi City ang napilasan sa likod kag tiil kasunod sang insidente.
Sa interview sang Bombo Radyo Bacolod kay Police Captain Lelanie Laguting, station commander sang Bacolod Police Station 10, naistorya na sini ang iloy sang biktima kag nagpahayag nga estable na ang kondisyon sang suldado sa isa ka hospital sa ciudad sang Bacolod.
Samtang ginpahayag ni Lagoting, nga may yara na sila sang duha ka mga persons of interest sa insidente kag ginatinguhaan sang imbestigador sang Bacolod Police Station 10 nga matumod ang mga ini.
Ipaidalom man sa cross matching ang mga bala nga narekober sa crime scene sa armas ni Gancia agud matumod isa lamang ka armas ang gingamit sang mga suspek sa pagluthang sa iya ukon may iban pa.
Suno sa imbestigasyon sang Police Station 10, ang biktima nagbisita sa balay sang iya nobya sa Deca Homes agud nga magtambong sa birthday party sang amay sang iya nobya.
Sang kaagahon na nagwa ang 70 anyos nga amay sang nobya sang biktima kag nakita ang tatlo nga nagahampang sang cellphone samtang nagaconnect sa Piso Wifi sa tiyangge, nagpamangkot ang senior citizen kun sa diin puede makabakal sang sigarilyo sadto nga tion, apang ginapahayag nga pabalang ang sabat sang ginpamangkutan sini nga nagluntad ang argumento.
Gilayon man nga nagresponde ang biktima bangud nabatian sini nga nagtaas na ang tingog sang senior citizen kag nagluntad ang shooting incident.
Sa karun padayon pa ang imbestigasyon sang Bacolod Police Station 10 sa insidente kag may yara naman sila sang lead kun sa diin sa karun ang duha ka mga persons of interest sa nagtiro sa biktima.
Ang biktima ang padayon nga nagapabulong sa ospital mataos masamaran sa nagluntad nga shooting incident.
