Patay ang 26 anyos nga miyembro sang Philippine Army matapos nga maaksidente sa Purok Sambag, Brgy Libas, banwa sang Isabela, Negros Occidental, kaina alas-6:20 sang aga.
Sa interview sang Bombo Radyo kay Police Major Ellendie Rebusquillo, hepe sang Isabela Municipal Police Station, nagamaneho sang motorsiklo papauli gikan sa trabaho si Private First Class Dexter Castañares.
Suno diri, residente si Castañares sang Brgy Maindang, banwa sang Cuartero, probinsya sang Capiz apang temporaryo nga nagatinir sa Brgy. Sikatuna, banwa sang Isabela bangod nga naasign ini sa 62nd infantry Battalion.
Suno kay Rebusquillo, nagtabok ang duha ka pedestrian nga mga menor de edad nga ulihi na nga nanotisyaran ni Castañares.
Gilayon ini nga nagpreno kag wala na sini nakontrolar pa ang motorsiklo bangod nga dulhogon ang dalan.
Nagtabog ini kag nag-agom sang pilas sa ulo kag natuo nga tiil.
Samtang, kasubong man nga nag-angkon sang mga pilas ang duha ka menor de edad.
Gindala sa ospital ang duha ka menor de edad kag si Castañares, apang gindeklarar ang suldado nga dead on arrival.
