Nakarecord ang Negros Occidental Police Provincial Office (NOCPPO) sang pinakauna nga police personnel nga napatay bangod sa COVID-19.
Suno kay NOCPPO deputy spokesperson P/Lt. Abegael Donasco, ang 42 anyos nga police personnel nga nagtaliwan ang nakabatyag sang sintomas sang COVID-19 gani nagpaswab ini sang Hunyo 18.
Naggwa ang resulta sang RT-PCR test sang Hunyo 19 kag ini ang nagpositibo.
Gilayon ini nga ginpaidalum sa isolation, apang nabudlayan ini sa pagginhawa gani ang pasyente ang gin-admit sa ospital sa Bacolod City sang Hunyo 21.
Apang ang police personnel ang ginbawian sang kabuhi sang Hunyo 26.
Sa karun, ginahulat nalang sang NOCPPO ang death certificate sang biktima, nga magapakita sang gintunaan sang iya nga kamatayon.
Suno kay Donasco, ang P/Staff Sgt. nga personnel sa Sipalay City Police Station ang wala man sang nahibaluan nga comorbidities.
Gilayon naman nga ginpaidalum sa quarantine ang mga close contact sang nagtaliwan nga pulis ilabi na ang pamilya sini.
Nagpasalig naman ang NOCPPO nga magahatag sang financial assistance sa pamilya sang police personnel.
Dugang pa ni Donasco nga nagrequest man sila sang bulig gikan sa Police Regional Office 6 kasubong man ang insurance kun may Public Safety Savings and Loan Association Inc. (PSSLAI) ang nagtaliwan nga pulis.
Pasalig naman ni Donasco, nga gilayon ini nga mahatag sa pamilya sang nagtaliwan nga Police Personnel, kaangay sa kun paano ginaproseso gilayon ang bulig sa mga nagapositibo sa COVID-19 kag nagaayo.
Sa kabug-usan, nagdangat na sa 177 ang nagpositibo sa COVID-19 nga mga Police Personnel sa NOCPPO, kun sa diin 34 ang nabilin nga aktibo kag isa palang ang death toll.
Pahanumdom ni Donasco, nga sa pagtaliwan sang isa ka kaupod nila sa hanay, nagapamatuod man ini sa kun ano ka matuod ang virus.
Gani pahanumdom sini nga maghalong ang mga kapulisan, agud indi na madugangan ang numero sang nagtaliwan sa hanay sang Philippine National Police (PNP).
Magluwas sa mga kapulisan, pahanumdom man ni Donasco sa tanan nga frontliners nga halungan ang kaugalingon agud makapadayun pa sa pagserbisyo sa publiko.
