Ginavalidate pa sang Sagay City Police Station kun nagreactive sa rapid test ang isa sa apat ka miyembro sang Philippine National Police – Special Action Force (PNP-SAF) nga nag-abot sa ciudad sang Sagay kahapon sang aga nagikan sa Manila.
Sa interview sang Bombo Radyo kay Police Major Antonio Benitez, hepe sang Sagay City Police Station, ginpahayag sini nga nakakuha sila nga initial report nga nagreactive sa rapid test ang isa sa mga miyembro sang PNP-SAF nga nag-abot kahapon sa sang aga sa BREDCO Port kag nagdiretso sa ciudad sang Sagay sakay sa isa ka pribado nga salakyan.
Suno kay Benitez, may yara sila sang ginapatigayon nga initial screening sa ila border control kun sa diin ginpaidalum ang mga ini sa rapid test kag isa ang nakitaan sang sintomas sang COVID-19.
Gin-athag naman sang hepe nga indi pa ini kompirmado nga positibo sa virus bangud bwas pa ang mga ini kuhaan sang swab test.
Sa karun, suno sa iya, yara sa quarantine center sang ciudad sang Sagay ang apat ka mga opisyal kag magapaidalum sa 14 day mandatory quarantine.
