Nakagwa na sa prisuhan ang miyembro sang transport group nga ginpasakaan sang kaso nga direct assault sa nangin magamo nga rally-protesta sang Miyerkules.
Madumduman nga gin-aresto ang pila ka lideres kag mga miyembro sang Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO) kag United Negros Drivers and Operators Center (UNDOC).
Ang lima kalakip na ang mga lideres sang tatlo ka grupo ang una nga nakagwa sang Huwebes sang kaagahon matapos magpyansa sang P3,510 kada isa sa kaso nga disobedience to authority, illegal act of assembly kag bayolasyon sa no permit no rally policy.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ang miyembro sang KNETCO nga si Melchor Umangayon ang kapin alas-8:30 kagab-i lamang nakagwa matapos magpyansa sang P36,000 sa kaso nga direct assault.
Madumduman nga sa natabo nga rally protesta, sila ang gindisperse pinaagi sa water cannon, samtang may mga nagbato naman kag nagpanghaboy sang bato sa mga kapulisan.
Suno kay Tolentino, indi lamang isa ang kapulisan nga nahalitan, apang isa lamang ang nag-angkon sang pilas sa ilong.
