Liwat naman nga naglupok ang Bulkan Kanlaon alas-6:07 kagab-i, Marso 15.
Sa interview sang Bombo Radyo Bacolod kay Pearly Sianson, Science Research Specialist sang PHIVOLCS Kanlaon Volcano Observatory, nagpatigayon sang moderately explosive eruption ang Bulkan kag ang plume ang nagdangat sa 5,000 meters gikan sa crater nga ginpalid sa southeast padulong sa northeast nga direksyon.
Ang mga naapektuhan sang ash fall amo ang banwa sang La Castellana, San Carlos City kag Canlaon City.
Ginamonitor pa sa karun ang mga lugar nga naapektuhan sang ashfall.
Suno kay Sianson, ginadumilian ang pagsulod sa 4-km Permanent Danger Zone (PDZ), samtng nagapabilin sagihapon nga napaidalom sa Alert Level 2 ang bulkan.
Nagpahanumdom si Sianson sa mga pumuluyo nga magpabilin nga naga-aligmat, magsuksok sang facemask, kag kun mahimo magpabilin na lamang sa sulod sang balay.
Madumduman nga ini na ang ikatatlo nga paglupok sang bulkan sini nga 2026 kun sa diin ang una ang natabo sadtong Pebrero 19 kag Pebrero 26.
