Ginhatagan na sang citation ticket ang modernized jeepney driver nga nakuhaan sang video nga naglusot sa intersection apisar nga nakapula na ang traffic light sa dalan Gatuslao sa Bacolod City.
Sa interview sang Bombo Radyo Bacolod kay Bacolod Traffic Authority Office deputy head Jose Antonio “Jojo” Robello, sang ginpakita sa iya ang dashboard footage gikan sa kaatubang nga salakyan, nakita na sini nga may-ara gid sang maathag nga bayolasyon.
Makita sa video nga nakapondo na ang iban nga mga salakyan gikan sa Bacolod City Public Plaza kag may nakalusot naman nga mga motorsiklo gikan sa opposite lane, apang sang makalampuwas na, hinali nga naglusot ang modernized jeep nga may routa Singcang Airport – Central Market kag ginhingalitan ang maligwa nga dalan apisar nga pula pa ang traffic light.
Bangod may mga contact man ini sa mga operator sang modernized jeepneys, gilayon sini nga gincontact nga nagpasalig man nga ila pagadisiplinahon ang ila driver.
Aminado si Robello nga nagahatag sang penalidad ang mga operator sa mga drivers nga makahimo sang sala kaangay sang suspension ukon dismissal.
Apang ginpakamaayo sini nga pakadtuon sa ila opisina ang driver agud ma-issuehan sang citation ticket nga ginpakadto man sang operator kasunod nga adlaw.
Ang violation sini amo ang “reckless driving” kag “disregarding traffic light.”
Aminado si Robello nga yara lamang sa P200 kag P300 ang nahatag nga penalidad sa violation.
Pangabay sini sa Sangguniang Panlungsod nga ma-amyendahan na ini kag mapasakaan ang penalties agud magkakulba man ang mga motorista sa pagbayolar sa traffic rules.
Panawagan sini nga apisar wala sang traffic enforcers, indi pwede nga magpanigusto na lamang kag indi na sundon ang batas trapiko.
Pahanumdom sini sa mga public utility vehicles nga antes magrisgo, pinsaron gid nga sila ang may karga nga madamo nga kabuhi.
