Gin-anunsyar sang alkalde sang Moises Padilla nga magapatigayon sang random swab test sa kada panimalay nga may himata nga nagpauli nagikan sa iban nga mga local government unit sa bulan sang Enero.
Suno kay Mayor Ella Yulo, bangud nga holiday season, ginalauman nga may mga residente nga nagaubra sa luwas sang banwa nga magapauli sa Moises Padilla.
Gani agud masigurado nga indi ini makahatag sang problema, kun makahalin na ang nasambit nga residente sa banwa, magakuha sang isa ka miyembro sang pamilya kag ipaidalum ini sa swab test agud gilayon nga madetect kun infected ini sang COVID-19 kag mahibaluan kun ano ang himuon.
Suno sa alkalde, lima ka adlaw matapos maghalin ang himata nga naga-ubra sa luwas sang banwa, gilayon nga ipatigayon ang test sa isa ka miyembro sang ginhalinan sini nga household.
