Nadala na sa punerarya ang bangkay sang anum ka tuig nga bata sang masalabat sang bala sa nagluntad ang engkwentro sa tunga sang 62nd Infantry Battalion sang Philippine Army kag ginapatihan nga mga miyembro sang makawala nga grupo sa Sitio Matil-e, Barangay Quintin Remo, Moises Padilla, Negros Occidental kahapon sang aga, Oktubre 28.
Sa interview sang Bombo Radyo Bacolod kay Kersey Sumadhay, pinuno sang Municipal Social Welfare and Development Office sang Moises Padilla, ginpanaog kahapon sang hapon ang bata kag gindala sa punerarya.
Suno kay Sumadhay, ang bata ang residente sang Sitio Inangaw tabok lamang sang encounter site nga Sitio Matil-e kag hapon na nga nagapanaog ang bangkay bangud ang lugar nga naistaran sini ang pinakalayo nga sitio sang nasambit nga barangay.
Nagpasalig naman ang alkalde sa banwa nga magahatag sila sang bulig sa pamilya sang napatay nga bata.
Sa interview sang Bombo Radyo Bacolod kay Mayor Ella Yulo, may yara sila sang funeral assistance nga ihatag sa nalisdan nga pamilya.
Suno kay Yulo, mapatigayon man sang psychological debriefing ang Municipal Social Welfare and Development Office sa pamilya sang biktima kag kinahanglanon magapatigayon man sila sang psychological intervention bangud traumatic ang eksperyensya.
Suno sa akalde bangud sa natabo naman nga engkwentro mabudlayan naman ang mga pumuluyo sa nabukid nga bahin sang banwa nga magtrabaho sa ila nga mga uma bangud sa kakulba nga magtiniruhay naman.
Panawagan sini sa mga rebelde nga magsungka na kag mag-avail sang programa sang gobyerno para sa ila.
Dugang pa sini nga wala gid sang maayo nga madulot ang inaway bangud may mga sibilyan kag inosente nga nagakaulamid.
