Ginabantayan sang Disaster Risk Reduction and Management Office (DRRMO) sang Moises Padilla ang suba ilabi na sa tion nga mag-ulan.
Sa interview sang Bombo Radyo Bacolod kay Reynaldo Horegue, pinuno sang Moises Padilla Municipal Disaster Risk Reduction and Management Office (DRRMO), ginamonitor sang mga ini sa tion nga mag-ulan ang suba sa Barangay Guimpana-an nga nagailig sa Poblacion sang banwa, magaagi sa Binalbagan lapos sa banwa sang Isabela, Negros Occidental.
Suno kay Horegue indi man gid malala ang mud flow bangud indi man malapuyot ang nagailig sa suba kundi abo lamang ini nga nagikan sa Bulkan kag gin-anod sang tubig ulan nga nag-ilig sa suba.
Suno diri, mas maayo nga talithi lamang ang nagtupa agud amat-amat lamang ang pag-ilig sini sangsa magdamol ang ulan kag gulpyada ang pagdako sang tubig sa suba nga may dala nga abo nagikan sa bulkan kag mas malain ang epekto.
Ginpahayag man sini nga wala man sang ashfall nga narecord ang banwa.
Apang ang problema sa karun amo ang mga isda nga yara sa suba ang nagakalamatay bangud sa gin-ilig nga abo gikan sa bulkan nga may yara sang asupre.
Dugang pa sini nga wala man sang mga residente nga nagapuyo sa lugar nga nalakip sa 10km danger zone sa tion nga magsaka sa Alert Level 4 ang status sang Bulkan Kanlaon.
Samtang suno diri may yara na sila sang napermahan nga memorandum of agreement sa Guihulngan City, Negros Oriental nga mahimo ipahulam ang ila nga mga pasilidad sa tion nga may i-evacuate nga mga residente nagikan sa banwa sang Moises Padilla sa tion nga maglala ang sitwasyon bangud sa Bulkan Kanlaon.
