Hilway na sa mga kaso ang bise alkalde sang Moises Padilla matapos nga gindismiss sang korte ang kaso nga murder batok sa iya kag 13 ka iban pa nga may kaangtanan sa kamatayon ni Moises Padilla Councilor Jolomar Hilario sadtong 2019.
Sa interview kay Moises Padilla Vice Mayor Ian Villaflor, ginkalipay sini ang desisyon sang korte nga pagdismiss sang murder batok sa iya kag sa iban pa nga mga akusado kag suno diri inosente gid man sila sa kamatayon sang konsehal sang banwa.
Ang desisyon ang nagwa sang Pebrero 28 kag ini ang ginpagwa ni Acting Presiding Judge Ma. Anna Priscila Pareja sang RTC Branch 64, Guihulngan City kun sa diin nakasaad nga ang kaso sang mga akusado sa pagpatay kay SB Hilario sa sulod sang iya balay sang Marso 31, 2019.
Suno kay Villaflor, nagapasalamat ini sa Ginoo nga bangud sa dismissal sang kaso napamatud-an nga sila ang inosente.
Suno sa bise alkalde gin-dismiss ang kaso bangud nga indi na interesado ang complainant nga anak man ni Hilario sa pagpadayon sini kun sa diin tatlo ka beses ini nga wala nagtambong sa hearing.
Magluwas sa bise-alkalde, nalakip man sa mga akusado sanday Moises Padilla Councilor Vincent Bryan Garcia kag anay Isabela Mayor Joselito Malabor.
Nagmando man ang korte suprema ang BJMP Negros Occidental District Jail nga hilwayon ang tanan nga akusado nga yara sa ila nga kustodiya samtang ginapa-release ang piyansa nga ginbayad ni Villaflor kag iban pa sadtong 2022.
Ginpahayag man sini nga sang nagwa sadto ang warrant of arrest sini nagsungka ini sa National Bureau of Investigation kag sang nagdaog ini sa iya ikaduha nga termino samtang yara sa paghinakop sang NBI.
