Nakapaghinon-anon na si Moises Padilla Vice Mayor Ian Villaflor sa pamilya sang napatay nga 21 anyos nga 3rd year College student nga babayi matapos maguyod sang motorsiklo nga ginsipa sang wala makilal-an nga persona sa Sitio Balogo, Brgy. Magallon Cadre, Poblacion, Moises Padilla, Negros Occidental, sang Miyerkules, alas-4:45 sang hapon.
Ang biktima ang ginkilala nga si Deserie Tadena, 21 anyos, 3rd year student sa kurso nga Bachelor of Science in Elementary Education sa Central Philippine State University.
Sa interview sang Bombo Radyo sa bise alkalde, papauli na ang biktima sakay sa motorsiklo nga ginamaneho sang iya tiyo padulong sa Brgy Quintin Remo.
Apang sila ang temporaryo nga nagdulog sa kilid sang dalan bangod nagpangihi ang tiyo.
Nabalikdan na lamang sang tiyo nga naglabay ang motorsiklo kag ginsipa sang driver ang biktima nga nagasakay sa iya nakaside stand nga motorsiklo kun sa diin nakita sang tiyo nga ginadusdos sang motorsiklo ang iya hinablos.
Suno kay Villaflor, nakapabloter na ang pamilya kag padayon nga nagakooperar sa kapulisan.
Suno pa diri, ang suspek ang nagasuksok sang puti nga bayo, itom nga short kag may tattoo.
Nakita pa ang suspek nga nagbakal sa tyangge kag paglabay sang mga tiyo, ini ang iya ginsundan.
