Dako ang pagpasalamat sang re-elected nga bise-alkalde sang Moises Padilla sa mga pumuluyo nga wala untat nga nagsuporta sa ila partido, pila ka adlaw matapos nakapauli ini sa iya puluy-an matapos nga makapyansa bilang akusado sa pagpatay kay Councilor Jolomar Hilario sa Barangay Inolingan, Moises Padilla, Negros Occidental, sang Marso 31, 2019.
Sa interview sang Bombo Radyo kay Vice Mayor Ian Villaflor, una gid nga ginhimo sini sang siya ang nakagwa amu ang pagpatigayon sang thanksgiving mass upod kay Mayor Ella Garcia-Yulo kasubong man ang iban pa nga opisyales nga may kaso.
Suno kay Villaflor, pagkatapos sang misa, nagreport na ini sa opisina kag automatic nga nagtrabaho sa opisina sang bise-alkalde.
Ginpahayag man sini nga apisar nga yara pa siya sa kustodiya sang National Bureau of Investigation (NBI), naka-assume naman ini sa trabaho kag natigayon nga naaprubahan ang ila budget sang Disyembre 2021 paagi sa teleconference meeting.
Bwas nga adlaw, Huwebes, magapatigayon man sila sang oath taking kag inauguration alas 10:00 sang aga.
Sa liwat sini nga pagkahilway, nagapangamuyo si Villaflor nga mangin malinong kag mataw-ay na ang ila banwa kag indi na masulit ang natabo sa ila bangud wala man ang mga ini sang sala.
Suno diri, ang makaluluoy amu ang mga pumuluyo bangud limitado lamang ang mga opisyales nga gin-akusar nga makaserbisyo sa ila.
Suno sa iya, apisar nga sila ang magkasumpong ni Hilario, sila ang mag-abyanay gani indi sini mahimo ang mga ginaakusar sa iya.
Gindugang man sang bise-alkalde, sila ang gin-ambush, ginpasakaan sang kaso kag ang ila pamilya ang nagsakripisyo apisar nga wala sila sang sala.
Suno diri, mangin ang mga pumuluyo sang Moises Padilla ang nagapati nga wala sila sang sala bangud apisar sang natabo, siya ang nagdaog sa gihapon kag tuman pa kadako ang abanse.
Ini ang nagapatimaan lamang suno sa iya nga nakahibalo ang mga pumuluyo kun ano ang kamatuoran.
Nagapasalamat ini sa mga nagpangamuyo para sa ila grupo ilabi na para sa iya.
Suno diri, sa karun nga nakabalik na sila sa banwa, pagahimuon sini ang tanan agud makahatag sang maayo nga serbisyo agud indi sila mapaslawan sa iya ikaduha nga termino.
