Naglab-ot na sa kapin dos mil ka mga Covid test ang napatigayon sang Teresita Lopez Jalandoni Provincial Hospital molecular laboratory humalin sang nag-operate ini sang Hunyo 1.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, ginpahayag sini nga madasig ang pagpatigayon sang covid test bangud sa molecular laboratory sang probinsya.
Suno diri, wala sang backlog ang laboratoryo apang aminado ini nga may yara sang delay ang pagpagwa sang resulta bangud kinahanglan anay nga ipadala ang resulta sa Department of Health Region 6 antes pa ipagwa ang mga resulta kag mahatagan sang certification ang mga ginkuhaan sang swab samples.
Isa man suno kay Diaz nga nagaka-delay ang paggwa sang resulta ang kauti sang proseso sang DOH kun sa diin sa masobra dos mil ka mga napatigayon nga swab test kapin 1,600 lamang ang napagwa nga covid test results.
May yara sang ginpatigayon nga pagtililipon ang provincial government santo sa mando ni provincial Governor Eugenio Jose “Bong” Lacson kaupod ang representative sang molecular laboratory, nagapadalagan sang quarantine facilities, DRRMO nga nagasugat sa mga nagapauli nga mga LSI kag mga OFW kag katapo sang Provincial Health Office nga nagakuha sang mga swab sample kun sa diin nagpatigayon sila sang assessment matapos ang tatlo ka semana nga operasyon sang molecular laboratory agud mahibaluan kun sa diin ang kulang kag diri nakita nga ginakulang sila sang encoders.
Bangud sini, naghire ang provincial government sang lima ka mga encoders agud mas mapadasig ang reporting system.
