Duha na ang nainstall nga reverse transcription polymerase chain reaction (RT-PCR) equipment sang Teresita Lopez Jalandoni Provincial Hospital Molecular Laboratory sa syudad sang Silay.
Sa interview sang Bombo Radyo Bacolod kay Atty. Rayfrando Diaz, provincial administrator, ginpahayag sini nga nakapatigayon na sang swab testing ang laboratoryo.
Sang Hunyo 3 may yara sang 20 ka mga swab samples ang gintest kag gilayon naman nga naggwa ang resulta kun sa diin nagpositibo ang isa; Hunyo 4, 30 ka swab samples ang ginpatigayunan sang test kag wala sang nagpositibo sang naggwa ang resulta; Hunyo 5, 200 swab samples kag Hunyo 6, 130 swab samples kun sa diin lunsay nga ginahulat nga maggwa ang resulta kag ini ang kabahin sang proficiency week nga santo sa ginpahayag sang gobernador sa press conference sini sang tinalikdan nga semana.
Ang resulta sang swab test sa molecular laboratory sa Silay ang wala pa gin-anunsyar sa publiko bangud ginpasa pa ang test result sa Department of Health Region 6 bangud sila ang magahatag sang go signal agud opisyal ini nga maanusyar.
Samtang, nagpangabay man si Diaz sa Philippine Coast Guard (PCG) nga makig-angot sa probinsya sa tion nga pasugtan nga makapanaog ang mga LSI nga nagdungka sa mga puerto agud mapreparahan man bangud nagagutok na ang mga quarantine facilities kag mahimo nga indi na ang mga ini matatapan kay bangud wala na nakapreparar ang probinsya sa pag-abot nila.
