Gin-athag sang chairman sang inter-agency task force against COVID-19 sa ciudad sang Bacolod nga operational gihapon ang molecular laboratory sang Corazon Locsin Montelibano Memorial Regional Hospital (CLMMRH) kag nagapadala lang sang specimen sa molecular lab sang Cebu kun may yara sang surveillance testing.
Sa interview sang Bombo Radyo kay Vice Mayor El Cid Familiaran, ginpahayag sini nga kun may ginapatigayon nga surveillance testing, nagalab-ot sa 500 ang mga swab samples gani ila ini ginapadala sa Cebu agud madasig nga maangkon ang resulta.
Apang kun wala man lang sang surveillance testing, suno sa iya, ginapasa ini sa CLMMRH.
Suno kay Familiaran, operational ang molecular laboratory sa regional hospital halin sang pagsugod sini tubtob subong.
Suno sa iya, kun ginpasa ang swab sample antes mag-alas 2:00 sang hapon, pagka alas 7:00 sang gab-i, yara na ang resulta gani gilayon nga ginatawgan ang mga positibo kag ginapahibalo agud makapreparar kag maisolate ang kaugalingon.
Suno sa bise-alkalde, mas una pa nga nakahibalo ang mga pasyente nga positibo sang ila resulta sang sa City Health Office bangud gilayon sila nga ginacontact.
Suno diri, ang madugay lang amu ang pag-ubra sang hard copy sang resulta.
Kun maglapaw naman sa 2:00 pm nga cut off ang pagpasa sang specimen, bwas pa mahibaluan ang resulta sini.
Sa karun, suno kay Familiaran, yara na lang sa 10 ang maximum nga ginaswab sa CLMMRH bangud madutay naman ang mga kaso sang ciudad kag kun wala sang mga locally stranded individuals, nagapati ini sang sarang nga makaangkon sang 0 case a day ang Bacolod City.
Nagpahanumdum man ini sa mga pumuluyo nga magsunod sa health protocols kag nagpasalig nga padayon nga nagalibot ang Task Force Disiplina.
