Posible nga magabukas kag maga-operate na sa Disyembre ang ikaduha nga COVID-19 molecular laboratory sang probinsya sang Negros Occidental nga nahamtang sa Valladolid District Hospital.
Sa interview sang Bombo Radyo Bacolod kay Provincial Administrator Rayfrando Diaz, ginpahayag sini nga lapit nalang matapos ang amo nga testing laboratory bangud nga nag-abot na sang nagligad nga semana ang mga gamit.
Suno kay Diaz, pananglitan nga mangin operational na, sarang nga makaproseso sang 1,000 swab sample per day ang amo nga mole laboratory.
Dugang pa sini nga pwede gid makapadala diri sang swab sample ang Negros Oriental agud indi na kinahanglan pa nga dal-on ini sa Cebu.
Nahibaluan nga joint effort ini kaupod ang Manila-based company nga Safeguard Diagnostics.
Ang pribado nga kompaniya ang magasuplay sang equipment samtang ang provincial government naman ang maga-uyat sang pondo para sa laboratoryo.
Una na nga ginpahayag ni Diaz nga magabaton ang probinsya sang P95,000 kada bulan nagikan sa Safeguard Diagnostics bilang renta kag 5% rebate nagikan sa gross receipt sang kompanya.
